مواضيع مهمة

بالصوت والصورة

24 ساعة

مشاكل وحلول

الأربعاء، 9 ديسمبر 2015

ايه هى الإعاقة ؟

طب ايه هى الإعاقة ؟
االناس فاهمه لإعاقة بالتعريف السطحي لناس كتير هي أن يكون عندك مشكلة ف طرف من اطراف جسمك أو خلل ف اي عضو من اعضاء جسمك ، لكن ده مش صح بالمرة .
الإعاقة الحقيقية انك تكون سليم جسدياً لكن مفيش وجود ليك ف المجتمع ، معندكش طموح لحاجة ولا عايش بهدف ، مفيش رسالة توصلها للناس .
أنا برسم من يوم ما جيت الدنيا وماسبتش حاجة قدامي وأنا طفل غير لما رسمت عليها من أول الورق لحيطان البيت للدسك ف الفصل حتى الهدوم ..
كانت مُجرد هواية واتحولت لفكر وحلم بحاول انشره ع الارض ..
2011 كانت سنة فاصلة ف وجودي ونضجت وفهمت على ايد الثورة "أعظم حدث ف حياتي" ..
اتأثرت جداً من اولتراس اهلاوى
ماكنتش ف وسطيهم بس كنت بتابع شغلهم وأفكارهم واتعلمت منهم إنكار الذات ..
و في بنت ف حياتي سبب التطور والنضج والنجاح "اللي بيقول عليه ناس أني حققته" سبب كل حاجة .. ست الناس ..
انطلقت ع الحيطان انشر افكار أنا مؤمن بيها وأن الفن ملوش مكان ولا برواز ولا طبقة معينة للمجتمع
برسم وبتعامل مع ناس من مُختلف طبقات مصر
بنحكي عن الألوان والحق وبقولهم *يسمعوا صوت الحيطان*
بقالي 4 سنين ف تجارة القاهرة ولسه ف الفرقة التانية وبفتخر بده جداً على فكرة ..
عملت ورش علشان أعلم ناس مُهتمة اللي ربنا علمهوني واللي وصلتلوا بالشغف وقاعدة فنانين الشارع فعلاً بتوسع وتزيد
حلمي أني ارسم واغرق كل مكان اقدر اوصله بالحروف والألوان وحلمي فعلاً لمس أرض الواقع وبدأ .. وأن شاء الله هيكمل بدعم الناس المؤمنة بالألوان والفن ..
اهتموا بمواهبكم وحافظوا ع الشغف ، اطلعوا برة قاعدة ان انت اتخلقت علشان * تاكل وتشرب وتروح المدرسة وتعمل الواجب وتنام بدرى .. وتصحى بدرى تروح الجامعة علشان تلحق محاضرة الدكتور اللي بيطلع عقده عليك وف الآخر توصل متأخر 5 دقايق تطرد برة المحاضرة وتأكل وترجع البيت وتنام .. وتصحى تروح الشغل علشان تحوش فلوس وتلحق قطر الجواز وترجع تقعد ع القهوة وتطلع تاكل وتنام .. وتصحى تلاقي الحاجة زوجتك بنت صاحبتها ويطلع عينك وتخلف وتنام .. وتصحي تلاقي عيالك مش طايقاك ولا انت ولا هي وتتخانقوا وتأكل وتنام .. وتموت وتتنسي ومالكش لازمة ف الوجود .. زيك زيهم *
أنت اتخلقت علشان تكون أنت مش هما
اخيراً
"فن الشارع طريق الحُرية"
"إسمعوا حكاوي الحيطان ، الحيطان بتحكي."
تصوير : Hossam Atef Farouk
انستجرام : antikkahossam
ماذا يمكنك أن تقول حيال هذا الموضوع؟
 
copyright © 2013 مواقف مضحكة دوت كوم
GooPlz Blogger Template Download. Powered byBlogger blogger templates